Monday, October 1, 2007

من أوراق شابه مستقله 2

قبل استئناف الكتابه عن فكره استقلال المرأه اعتذر عن التأخير وذلك لظروف شهر رمضان و تكدس جدول الاعمال فى هذا الشهر الجميل

سبق وذكرت فى البوست السابق عن عوامل ظهور ما يسمى باستقلال المرأه وكيفيه تعامل المجتمع معها

وحاليا سانتقل لنقطه غايه فى الاهميه وهى تتعلق بموقف الفتاه من من فكره الاستقلال ذاتها وتلك هى النقطه الثانيه فى الموضوع وتأتى تحت مسمى عقده سندريلا او خوف المرأه الخفى من الاستقلال


وتتلخص فى أنه بالرغم من تزايد الاصوات المطالبه باستقلاليه المراه وتجاوز مرحله الاعتماديه على الرجل , الا ان التربيه الخاصه بالفتاه فى معظم الاحيان لاز الت تكرس فكره الاعتماديه على الرجل
فالكثير منا يربى على تعلم المهارات المنزليه لكن المهارات الخاصه بكيفيه التعامل مع الاخرين خارج المنزل وكيفيه مواجهه الحياه فى الخارج يتم تجاهلها مع تكريس الاعتقاد بان هناك دائما الامير الذى يأتى لكى يتحمل عنكى كل شئ لا عليكى سوى ان تكونى مطيعه له وستحصلى فى المقابل على الامان و الحمايه

لذلك فكثيرا ما تواجه المرأه الطامحه للحصول على استقلالها ضغوط نفسيه رهيبه- سواء من الاهل او الاصدقاء او المجتمع المحيط-وذلك لاشعارها بمدى الخطوره التى تعرض لها نفسها فى تقليل فرص حصولها على الامير

فعلى سبيل المثال لا الحصر يقال دائما ان طموحك المهنى يقتل امومتك ودورك كزوجه, وكأنه معنى أن تكونى طموحه متفوقه فى عملك ان تكونى زوجه فاشله و لا أم

فالكثيرات من النساء يعشن فى حيره وقلق لانه تكرس بداخلهن ان هناك تعارض بين الاستقلال وبين الحصول على الامان و الحمايه

بل هناك فتيات ونساء أتخذن درب الاستقلاليه فى الحياه ومع هذا يراودهن دائما حلم رجل ترمى عليه هذه المسئوليات التى تحملها


وهذا بسبب تربيه وجهت الى اجيال واجيال من النساء
ليس من السهل تغير ثقافه المجتمع ولكن لو بدأن الان بتربيه بناتنا بطريقه مختلفه فبعد عشر سنوات سيختلف الامر كثيرا

علينا ان نزرع بداخلهم الثقه بالنفس و الاحساس بالفخر بجنسهم
علينا ان نعلمهم مهارات الحياه ولا نقصر كل معارفهم على داخل المنزل

بعض التعديلات فى سلوكنا التربوى ستغير الكثير من ملامح حياتنا ,وتغير الى الافضل باذن الله

Wednesday, September 12, 2007

مبحبش الرجااااااالة




تنويه: قبل ماتقرأ وتقول ايووووووووون ظهرتوا على حقيقتكم المره يا ااكلين لحوم الرجال و الله المشاركه ده لذكر مش نتايه , وفكرنا ان ننزل البوست ده كأول مشاركه رجوليه فى المدونه وان شاء الله نستكمل فى شهر رمضان من اوراق شابه مستقله

وكل رمضان وكل نساء ورجال الأرض سعداء رفقاء احباء
رمضان كريم

فقال الدكتور حلاوه

أقر أنا الموقع أدناه أنني ذكر عاقل بالغ في كامل قوايا العقلية
وأصر على رأيي فعلا بأني مبحبش الرجالة
واللي عايز يرد عليا أنا موجود ينزل لي فارس لفارس
ايه المشكلة فعلا أيوة مبحبش الرجالة
مبحبش الرجالة اللي بتقف ع النواصي تبص شمال ويمين
ع اللي رايحين واللي جايين
أكيد لو سيادتك ماشي مع اخواتك أو المدام بتاعتك أو أمك
ويا سلام طبعا سيادتك بتبقى ماشي ع الطرف
علشان لو مراية تاكسي او تكتك حسب مستوى معيشتك
تخبط فيك بدالهم قال يعني الواد فدائي
سعادتك ماشي قوم ايه تقابل مجموعة لطيفة من الشباب
يبصوا عليك نظرة خاطفة ونظرة لطيفة على أي كيان نسائي جنبك
بتاع نص ساعة كده على أساس إنها النظرة الأولي
فتحاول تهدى شويتين وتحسبها مع نفسك
اثبت اعقل لا تغضب لا تغضب الغضب حماقة ياحورية
طيب العيال اللي معايا دول مالهم
تبص عليهم تاني في ايه غلط
لبس وزي الفل واسع فضفاض ماركة البحبحاني
آخرهم بيحطوا لحستين كحل من أبو نص جنيه
لما يبقوا سهرانين ولا حاجة
ترجع تبص على زاوية تانية هتخانق مع الشباب
أو للأسف الرجالة الكبار دول
بتهمة البص
القانون لا يحاسب البصاصين واللي واقفين ع النواصي
مش عايز أخش في حسبة الدين وآداب الطريق لأنها معروفة
قصدي الاحترام الانساني للذات وخصوصا النسائية
فكرة النظرة الجارحة أو الخادشة للحياء دي ليييييييييه؟
وكمان لو جنبها راجل يعني مش ماشية لوحدها
هيحصل إيه لو حضرتك حطيت وشك في الأرض وانت معدي جنبهم
بتهيألي شعور نظيف قوي ان الرجالة عندهم عزة نفس وكبرياء
بعيد عن فكرة الشمامين واللاهثين وراء المرأة في كل مكان
قلت اللي عندي يارجالة

Thursday, September 6, 2007

من أوراق شابه مستقله1

قبل البدء فى كتابه البوست التانى , دار فى رأسى عده موضوعات يمكن الكتابه بها ولكنى فضلت ان يكون هذا البوست عن الهدف من هذ المدونه و الذى لم يكن بالطبع هو كيل الاتهامات للرجل بقد ر ما نهدف الى تقديم النموذج الذى يجب ان تكون عليه المرأه فى عصرنا

لذا, سأتحدث اليوم عن أكثر كلمه حدث وراءها جدال فى تاريخ نضال المرأه فى حصولها على حقوقها المهضومه الا وهى الاستقلال

الكلام بخصوص استقلا ل المرأه هايخد أكثر من بوست لانى قررت اتناوله من عده أوجه بالترتيب:

أولا:ماهو المقصود بالمرأه المستقله ووظروف نشأه هذا التعبير؟

ثانيا هاتكلم عن عقده سندريلا او خوف المرأه من الاستقلال

ثالثا هاتكلم عن تجربتى كشابه مستقله

ونبتدى نقول كان يا ما كان فى فى عصر مش بعيد عنا وقرب يرجع لينا تانى كانت في المرأه يتم تربيتها بطريقه مزدوجه و النوع ده من التربيه اخد من الاستقلال تحمل المسئوليه يعنى الينت داخل البيت تتحمل المهارات اللى تخليها مسئوله عن اللى داخل البيت ,لكن فى نفس الوقت اى حاجه ليها علاقه بمهارات الاحتكاك بالعالم الخارجى فكانت المرأه تعامل هنا كالطفله التى لن تبلغ طور النضوج ابدا فهى ليست فى حاجه الا سوى ان يوجد فى حياتها الرجل دائما لكى ينوب عنها فى القيام لدورها فى العالم الخارجى

ولان هذا الوضع لم يكن طبيعى بتاتا وهذا لان المرأه منذ بدء الخلق شريكه للرجل وليس تابع
فكان عوده المرأه للمطالبه بلعب دورها فى العالم الخارجى امر طبيعى, وهو شئ لا ينقص من كونها أمرأه ولا يتعبر تعديا على دور الرجل فى الحياه فليس هناك تشريع سماوى واحد يقول أن من تشارك الرجل فى تعمير الكونواستغلال مواهبها وقدراتها لتقديم الافضل لمجتمعها تصبح مجرمه او فاسقه كما يدعى بعض شيوخنا الافاضل جزاهم الله

واستقلال المرأه لا يعنى انكار دور الرجل فى حياتها لان كل منهم له دور مؤثر فى حياه الاخر فهو الاب و الاخ و زميل العمل و الزوج فى المستقبل ده لو ربنا ار اد طبعا

وما ذكرته هو توضيح اننى أحاول ان اخرج من نقطه الالتباس و الصدام مع الرجل فى هذه النقطه

اما عن متى يبدأ الاستقلال فانا ارى انه يبدأ فكريا, اى ان تكون كل منا قادره على اتخاذ قرارتها بغض النظر عن نظره المجتمع لها وضغوط الاهل و وغيرهم وليس صحيح ان الاستقلال المادى يسبق الاستقلال الفكرى فكم من السيدات لديهم أمو الهم الخاصه ولكنهم كالجوارى واقل
لان المال اذا لم يكن مسبوق بفكر واعى وسليم لن يدعم كونى مستقله أولا
كما أن اختيارى كونى مستقله فى حياتى يعنى أننى حملت نفسى مزيد من المسئوليات لان الشخص الحر هو الشخص المسئول عن تصرفاته وليس كالطفل الذى يتحمل عنه ابويه كل شى

ولانى مؤمنه ان من يملك قوته يملك قراره ,فخروجى للعمل وانى اتحمل مسئوليه نفسى اقتصاديا هايساعدنى بالتأكيد فى انى اكون حره قرارى


وفى ختام الكلام عن ماذا يعنى استقلال المرأه أحب اقول أن حياتنا ملئيه بسيدات اقنعوا نفسهم بالتخلى تماما عن دورهم خارج البيت و الاعتماد على الرجل فى النيابه عنهم فى ذلك لكن الظروف جعلتهم يضطروا يواجه الحياه بعد ذهاب الرجل من حياتهم واكيد فى حاله الاضطرار بتكون المرأه غير مسلحه لا بخبره ولا ثقافه ولا مهارت تساعدها على اجتياز اللى هاتواجه من صعوبات
اذن فلنكن مستقلات من البدايه

Thursday, August 2, 2007

مجتمع النساء



تم بحمد الله تعالى افتتاح مدونة أرض النساء

ووزعنا الشربات وأطلقنا الزغاريد بمناسبه ذلك ومحدش يقولى نصيبى فين

طبعا بعد ما شربت الشربات عاوز تعرف ايه اللى خلانا نحن النساء نقدم على تلك الخطوه الفارقه

فى تاريخ المرأه على كوكب الأرض و الزهره و المريخ بإذن الله

الفكرة في مدونة مجتمع النساء إننا هنعتبرها أرضنا احنا

نحبها تكون عامله ازاي .. مواصفاتها ايه ... ونسائها من أي نوع ؟؟

لكن بتصور عقلاني وواقعي

ونحاول ننقله على أرض الواقع اللى قدامنا

مجتمع النساء لا يعني التعصب ضد الرجال

مجتمع النساء صورة لمجتمع نسائي نموذجي لذلك فمجتمع النساء قد ينتقد المرأة نفسها


الاستضافة مفتوحه لأي إنسان لديه عينان وأذنان وعقل وعنده استعداد للتطور

بنرحب بالآراء والمشاكل والتجارب الناجحة والفاشلة

نتناقش ونتعلم

ونحارب فكرة الاستسلام للأمر الواقع ... والخوف من الاعتراض .. و فكرة خلي المركب تمشي

هي كده كده هتمشي ... بس ممكن تمشي عدل وممكن تمشي عوج

محتاجين يكون عندنا أمل ونثق ف نفسنا و إن التغيير ممكن

التغيير و النهضه ف المجتمع مش هيحصل إلا لما نفهم احنا عاوزين ايه وراحيين فين

لذا هنعتبر المدونة أرضنا اللى مش موجوده على الواقع و هنحاول نوجدها سوا




هانبطل سكوت ونقول بأعلى صوت


فى أرض النساء لينا حقوق هانستعيدها وواجبات هنعرف ازاي نعملها


لينا حياه لازم نعيشها زى ما احنا عايزينها


no more fear